Kuri uyu wa gatanu tariki 3/5/2024, abakozi ba SGF basuye urwibutso rwa Bunyonga ruherereye mu murenge wa Karama akarere ka Kamonyi, banatanga inkunga y’amashanyarazi no gusana inzu, ku miryango 4 y’abarokotse jenoside yakorewe Abatutsi mu 1994. Ubuyobozi bw’umurenge,Ibuka ndetse n’imiryango yagenewe iyi nkunga bashimiye SGF kuba yaratekereje iki gikorwa cy’ingirakamaro.

Umunyamabanga nshingwabikorwa w’umurenge wa karama madamu Yvette Aline Nirere, n’umuyobozi wa Ibuka ku rwego rw’igihugu bwana Naphtal Ahishakiye, bombi bashimiye SGF ku kuba yazirikanye kuza gusura urwibitso rwa Bunyonga, bakanafata mu mugongo imiryango y’abarokotse jenoside yakorewe Abatutsi mu 1994.

Imiryango yahawe inkunga yashimiye SGF, kuko amashanyarazi bagiye gushyirirwa mu mazu azabakura mu bwigunge, ntibongere kuba mu mwijima, n’uzasanirwa inzu akaba agiye gutura mu nzu imeze neza.

Umuyobozi w’Agateganyo wa SGF madamu Nibakure Florence yasobanuye ko kwibuka no kuzirikana jenoside yakorewe Abatutsi ari inshingano, bikaba ari iyo mpamvu buri mwaka iki kigo gitegura gahunda yo gusura urwibutso, n’abaharokokeye bagatoranywamo abahabwa inkunga. Yibukije ko gahunda yo kwibuka jenoside yakorewe Abatutsi ari igikorwa gikwiye gushyigikirwa na buri wese, kugira ngo amateka ya jenoside atazibagirana, bityo n’abagerageza kuyipfobya no kugoreka amateka ntibagere ku ntego yabo.

Uru rwibutso rwa Bunyonga  ruruhikiyemo imibiri isaga 13,359 harimo abahiciwe bari bahungiye kuri uyu musozi, n’indi yagiye izanwa ikuwe muri Kayenzi, Mugina, Kayumbu n’indi mirenge igize icyahoze ari komini Kayenzi, ubu ni mu karere ka Kamonyi.

Uretse gufata mu mugongo imwe mu miryango y’abarokotse jenoside batuye mu Murenge wa Karama, SGF yatanze inkunga yo kubungabunga Urwibutso rwa Bunyonga.