Kuwa 23 Gicurasi 2025, abakozi ba SGF basuye urwibutso rwa jenoside yakorewe Abatutsi mu 1994 rwa Kabuye mu karere ka Gisagara, banoroza imiryango 9 y’abarokotse jenoside yakorewe Abatutsi mu 1994 batishoboye bo muri aka karere.

Umuyobozi mukuru w’agateganyo wa SGF madamu Florence Nibakure yihanganishije abarokotse jenoside yakorewe Abatutsi mu 1994, abashimira uburyo bakomeje kwiyubaka ntibaheranwe n’agahinda batewe n’ibibazo banyuzemo. Yabasobanuriye inshingano za SGF, ababwira ko hejuru yo gutanga indishyi ku bangirizwa n’inyamaswa zo muri parike cyangwa ahandi hantu hakomye ndetse n’abaterwa impanuka n’ibinyabiziga, SGF yihaye intego yo kujya igira urwibutso isura buri mwaka, ikanafata mu mugongo abarokotse jenoside.

Umuyobozi w’akarere ka Gisagara wungirije ushinzwe imibereho myiza y’abaturage madamu Dusabe Denise, mu izina ry’Akarere ka Gisagara yashimiye SGF kuba yarahisemo gusura urwibutso rw’Akarere kabo, n’inkunga yo koroza inka imiryango 9.

Ngabonziza Jean Damascene, ni umwe mu bahagarariye imiryango yorojwe inka. Yashimiye SGF ku kuba imworoje akaba agiye kwivana mu bukene. Yatangaje ko agiye gufata neza iyi nka, nibyara akazitura mugenzi we nawe ukeneye korozwa.

Iki gikorwa cyateguwe muri gahunda yo kwibuka ku nshuro ya 31 jenoside yakorewe Abatutsi mu 1994, cyateguwe ku bufatanye bwa SGF na IBUKA. Uhagarariye urwego rwa IBUKA nawe yitabiriye uyu muhango, anatanga ikiganiro kijyanye no kwibuka ku nsuro ya 31 Jenoside yakorewe Abatutsi mu 1994.