Impanuka nyinshi zo mu muhanda ziterwa n’abamotari. Mu bugenzuzi bwakozwe, byagaragaye ko benshi mu bamotari bateza impanuka biterwa no gutwara badafite uruhushya rwo gutwara abagenzi, urwo gutwara ibinyabiziga(permit) nta bwishingizi cyangwa batwaye ibintu bitemewe n’amategeko. Bene aba bamotari bazwi ku izina ry’inyeshyamba, bateje impungenge kuko bahungabanya umutekano wo mu muhanda. Mu bukangurambaga burimo gukorwa na SGF ifatanyije na Polisi y’igihugu, RURA na radio/tv10 kuri uyu wa 8 Nzeri 2024 bwakomereje mu karere ka Kirehe na Ngoma, abamotari bahakorera basobanuriwe ko bakwiye kugaragaza umusanzu wabo mu kurwanya impanuka, bakanagaragaza ababangiriza isura bakora mu buryo bunyuranyije n’amategeko.

Nsabimana Simon  umukozi wa SGF ushinzwe ubujyanama mu mategeko( legal advisor)  yasobanuriye abamotari ko kudafata ubwishingizi bakabirengaho bagatwara ibinyabiziga bibakururira ibibazo by’ubukene kuko nyuma yo gutanga indishyi ku watewe nabo impanuka, SGF ibakurikirana bagasubiza amafaranga yose yatanzwe mu gukemura ikibazo.

Bagiriwe inama yo gukurikiza amategeko, bakirinda ingaruka zishaririye zibazaho mu gihe bakoze ibinyuranyije nayo. 

Abamotari bahawe umwanya babaza ibyo badasobanukiwe ndetse banatanga ibyifuzo, nko kuba abanyamaguru nabo bakangurirwa kwitwara neza mu muhanda kuko rimwe na rimwe babateza impanuka.