Muri gahunda SGF ifatanyamo ubukangurambaga na polisi y’igihugu ndetse na RADIO/TV 10 binyujijwe mu kiganiro motari time kinyuzwa kuri iki gitangazamakuru, kuri uyu wa 22 Kanama 2024 iki gikorwa cyabereye mu karere ka Rwamagana na Kayonza. Umuyobozi w’akarere ka Rwamagana bwana Mbonyumuvunyi Rajab yasobanuriye abamotari bitabiriye iki gikorwa ari benshi ko nta muntu watera imbere adafite ubuzima, bityo bakaba bakwiye kwirinda impanuka, bagakurikiza amategeko y’umuhanda.

Umuyobozi w’akarere ka Rwamagana yasobanuye ko bamwe mu bamotari batwara badafite impushya, nta bwishingizi,bakagira uruhare mu gutwara no gukwirakwiza ibiyobyabwenge. Ibi bigira ingaruka mu guteza umutekano muke, kuko hari n’abica abantu bitewe no gutwara batabifitemo ubumenyi. Ibi bidindiza iterambere ryabo kuko nta watera imbere yamugaye cyangwa atakiriho. Yabagiriye inama ko bakora akazi kabo neza uko bikwiye, umuntu akava mu rugo akagaruka amahoro.

Emilien Mutuyeyezu, umukozi wa SGF ushinzwe inspection yasobanuriye abitabiriye iki gikorwa serivisi za SGF, agaragaza amakosa ajya akorwa n’abamotari agateza impanuka harimo gutwara nta bwishingizi. Yabasobanuriye ko mu gihe umumotari ateje impanuka nta bwishingizi uwo igizeho ingaruka ahabwa indishyi,ariko izo ndishyi zikazishyuzwa uwateje impanuka. Yabasabye kwirinda amakosa kandi bakarangwa n’ikinyabupfura mu kazi kabo ka buri munsi.

Nyuma yo kuganira n’abamotari bakorera mu karere ka Rwamagana, iki gikorwa cyakomereje mu karere ka Kayonza, abamotari baho nabo bahabwa impanuro. Nyuma y’ibiganiro abamotari bahawe umwanya babaza ibibazo bijyanye n’akazi kabo, abayobozi babaha ibisubizo n’ibisobanuro.