Kuva ku itariki ya 9 kugera kuya 12 Ukuboza 2024, SGF ku bufatanye na Polisi na Radio tv10 basuye abamotari bakorera mu turere twose two mu ntara y’uburengerazuba, babasobanurira inyungu zo gufata ubwishingizi n’ingorane bahura nazo mu gihe batwaye ibinyabiziga batabufite. Abamotari baboneyeho umwanya wo gusobanuza no gutanga ibitekerezo byabafasha ngo akazi kabo kagende neza.

Abayobozi mu nzego z’ibanze nabo bitabiriye ibi biganiro. Bashimiye SGF n’abafatanyabikorwa bateguye iyi gahunda y’ingirakamaro, kuko byafashije abamotari gusobanukirwa bakaba bagiye kwirinda amakosa yajyaga atuma bateza impanuka n’umutekano muke mu muhanda.

Bimwe mu bibazo byabajijwe n’abamotari, harimo kuba rimwe na rimwe bagongwa n’amagare ntibabashe kugira urwego rubafasha mu gihe bakomeretse cg hari ibyabo byangiritse. Bagiriwe inama yo kujya bakurikirana nyir’igare ryateje impanuka.

Bagiriwe inama yo kujya birinda gutwara abagenzi bafite forode, ibiyobyabwenge n’ibindi bintu bitemewe, kuko mu gihe bafashwe amategeko abahana nk’abafatanyacyaha.