Kuva ku itariki 15 kugeza kuya 17 Mutarama 2025, SGF ku bufatanye na RADIO/TV10, polisi y’igihugu na RURA, bagiranye ibiganiro n’abamotari bakorera mu turere two mu ntara y’amajyepfo. Abamotari basobanuriwe inyungu zo gufata ubwishigizi ku gihe n’ingorane bahura nazo mu gihe bakora impanuka nta bwishingizi, banagirwa inama zo kujya bitwara neza bakirinda impanuka.

Uretse SGF n’abafatanyabikorwa bateguranye iki gikorwa, izi gahunda zanitabiriwe na bamwe mubayobozi mu nzego z’ibanze nabo bagiriye inama abamotari yo kujya bitwararika bakirinda icyahungabanya umutekano wo mu muhanda.

Nsabimana Simon wari uhagarariye SGF muri ubu bukangurambaga yasobanuriye abitabiriye iki gikorwa serivisi za SGF, ibyangombwa bikenerwa mu gusaba indishyi, n’uburyo uwateje impanuka yishyuzwa ibyo SGF itanga ku watewe ibibazo n’impanuka.

Abamotari bahawe umwanya barabaza banasobanuza ibyo batari bazi yaba ku bijyanye na serivisi z’ubwishingizi,izijyanye n’indishyi SGF itanga,ibyangombwa bakenera muri RURA, na zimwe mu mbogamizi bajya bahura nazo nko kwandikirwa amakosa na polisi bigaragara ko yakorewe mu gace batagezemo. Abayobozi barabasobanuriye, bababwira inzira banyuramo mu kugaragaza ibyo bibazo bikiba ku nzego zibishinzwe bigakemurwa.

Ubukangurambaga bwakorewe mu turere twose two mu ntara y’amajyepfo uretse akarere ka Nyamagabe. Uturere twakorewemo ubukangurambaga ni Gisagara, Huye, Nyaruguru,Nyanza,Ruhango, Muhanga na Kamonyi.