Kuri uyu wa 24 Mutarama 2025, imiryango 4 y’abarokotse jenoside yakorewe Abatutsi mu 1994 bo mu Karere ka Rubavu yorojwe na SGF ku bufatanye na komisiyo y’igihugu y’uburenganzira bwa muntu. Umuyobozi mukuru w’agateganyo wa SGF madamu Florence Nibakure wari uhagarariye SGF muri uyu muhango, yabwiye abawitabiriye ko SGF yatanze inkunga yo koroza aba baturage, mu rwego rwo gutanga umusanzu mu kuzamura imibereho myiza y’Abanyarwanda.

Umuyobozi mukuru w’agateganyo yakomeje asobanura ko uretse gutanga indishyi ku baterwa impanuka n’ibinyabiziga bitamenyekanye n’ibidafite ubwishingizi ndetse n’abangirizwa ibyabo cyangwa bagakomeretswa n’inyamaswa, SGF inagira uruhare mu bikorwa byo gushyigikira iterambere ry’abaturage, akaba ari muri uru rwego yashyigikiye gahunda yo koroza iyi miryango. Yabijeje ko SGF izakomeza gushyigikira ibikorwa bizamura imibereho myiza y’abaturage.

Perezida wa komisiyo y’igihugu y’uburenganzira bwa muntu madamu Umurungi Providence yashimiye SGF ku kuba yarashyigikiye iki gikorwa bateguye cyo koroza abaturage. Yashimiye n’ubuyobozi bw’akarere ka Rubavu bwabafashije guhitamo izi nka n’itegurwa ry’uyu muhango. Yasobanuye ko uretse gufasha Leta mu migendekere myiza y’uburenganzira bwa muntu, banatanga umusanzu mu gutuma umuturage agira imibereho myiza. Akaba ari muri urwo rwego bateguye iki gikorwa cyo koroza abaturage.

Perezida wa Ibuka mu karere ka Rubavu yashimiye SGF na komisiyo y’igihugu y’uburenganzira bwa muntu kuba babazirikanye bakabaha inka. Yasobanuye ko inka ari ikimenyetso cy’urukundo n’icyizere, bikaba bigaragaza urukundo Leta ibafitiye. Yijeje ko izi nka zizafatwa neza, ndetse abazihawe bakazoroza bagenzi babo.