Kuri uyu wa 17 Werurwe 2024, nibwo imurikagurishwa n’imurikabikorwa byaberaga mu karere ka Nyagatare byasojwe. Iki gikorwa cyasojwe ku mugaragaro n’umuyobozi w’akarere ka Nyagatare bwana Gasana Stephen. Yaba we ndetse n’abandi bayobozi bafashe ijambo muri uyu muhango bashimiye abateguye n’abitabiriye iki gikorwa.

Iki gikorwa cyari cyatangiye ku itariki 13/3/2024, SGF yasobanuriye abasuraga ikibanza cyayo (stand) ibijyanye na serivisi itanga, gutanga ibisobanuro kuri bamwe mu bagiye bagira ibibazo by’ubwone bw’inyamaswa cyangwa impanuka zo mu muhanda. Abayobozi bashimye serivisi za SGF, ariko banatanga inama ko abagenerwabikorwa bajya bafashwa bakishyurwa indishyi bidatinze.

Iri murikabikorwa n’imurikagurisha ryari rifite insanganyamatsiko igira iti “ubukungu bushingiye ku bikorerwa iwacu,guhanga ibishya na serivisi inoze niyo ntego yacu” Ryitabiriwe n’abikorera, imiryango itegamiye kuri Leta, n’ibigo bya Leta bikorera mu karere ka Nyagatare. Bikaba byarateguwe ku bufatanye bw’akarere, JADF, na PSF. Abafatanyabikorwa bose babyitabiriye bahawe seritifika(certificates) nk’ishimwe ku bikorwa byiza bakomeje gukora bishyigikira  iterambere ry’igihugu.