Kuri uyu wa 23 Mata 2025, mu cyumba cy’inama cy’intara y’amajyaruguru habereye inama SGF yagiranye n’abayobozi mu nzego z’ibanze, n’abandi bafatanyabikorwa bagira uruhare mu kuzuza amadosiye asaba andishyi zihabwa abangirizwa n’inyamaswa zituruka muri pariki, ibiyaga n’ahandi hakomye. Hagaragajwe impungenge z’amadosiye y’ubwone agenda azamuka mu buryo bukabije, abasaba indishyi mu buriganya, n’izindi mbogamizi zigaragara mu kunoza imikorere n’imikoranire.

Umuyobozi mukuru wa SGF w’agateganyo madamu Nibakure Florence yashimiye abafatanyabikorwa ku ruhare bagira mu gutuma inshingano za SGF zigerwaho, gusa agaragaza ko hakiri ibikwiye kongerwamo imbaraga kugira ngo hakumirwe ibituma imikorere itagenda uko bikwiye. Aha yatanze urugero rw’abasaba indishyi ku mitungo itangijwe, bagatanga amafoto agaragaza amatungo yerekana umubare wo hejuru, abishyuza imirima itarangijwe n’inyamaswa, amadosiye atinda kugezwa kuri SGF, umubare wa dosiye zisaba indishyi uzamuka bikabije, n’ibindi. Yasabye abafatanyabikorwa kongera ingufu mu gukumira ibi bibazo, guhana amakuru ku gihe, no kunoza serivisi zihabwa abaturage.

Guverineri w’intara y’iburasirazuba bwana Pudence Rubingisa yashimiye SGF ku bufatanye mu gukemura ibibazo by’abaturage bangirizwa n’inyamaswa, asaba ko hakongerwa ingufu mu gukurikirana ibibazo by’abaturage bonerwa ntibahabwe indishyi ku gihe.

Muri iyi nama, abayitabiriye biyemeje kunoza imikorere n’imikoranire hagamije kunoza serivisi, no gukumira izi nyamaswa, hanemezwa gahunda yo kongera ubukangurambaga mu baturage, ahagaragara ibibazo kuruta ahandi.