Kuwa 28 Mata 2025 mu karere ka Musanze habereye inama ya SGF n’abafatanyabikorwa bayo barimo abayobozi mu nzego z’ibanze mu turere twegereye pariki y’ibirunga, iya Gishwati- Mukura, RDB, n’abandi. Hafashwe imyanzuro izatuma amadosiye asaba indishyi adakomeza kuba menshi, hakanakumirwa inyamaswa zangiriza abaturage.

Umuyobozi Mukuru wa SGF w’agateganyo madamu Florence Nibakure yagaragarije abitabiriye iyi nama uburyo dosiye zisaba indishyi zirimo kwiyongera ku muvuduko munini, abasaba indishyi mu buriganya,abazana dosiye zisaba indishyi zitujuje ibyangombwa bikenewe, n’ubushishozi buke mu gihe hasuzumwa dosiye z’ibyangijwe n’inyamaswa. Yasabye ko abayobozi mu nzego z’ibanze bagira uruhare mu gutuma ibi bibazo bikemuka.

Guverineri w’intara y’amajyaruguru bwana Mugabowagahunde Maurice yashimiye SGF kuba yarateguye iyi nama, kuko byatumye barushaho gusobanukirwa n’imikorere y’iki kigo, bikazajya biborohereza mu gufasha abaturage bajyaga babagezaho ibibazo bijyanye n’ubwone bw’inyamaswa. Yashishikarije abayobozi mu nzego z’ibanze bitabiriye iyi nama kongera imbaraga mu gukemura ibibazo byagaragajwe hakumirwa uburiganya mu basaba indishyi mu nzira zidakwiye, gukumira inyamaswa zangiriza abaturage,kugeza amafaranga ku makonti y’abaturage bidatinze mu gihe SGF yabishyuye,no kurushaho gutanga serivisi inoze.

Muri iyi nama hemejwe ko hagiye kongerwa imbaraga mu bikorwa byo kwegera abaturage,nabo bakagira uruhare mu gukumira izi nyamaswa zibangiriza, batanga amakuru y’aho zisohokera hakazitirwa, bakanakora ibikorwa byo kwirinda no kurinda ibyabo nko kubaka ibiraro byarinda ko inyamaswa zica amatungo.