Mu rwego rwo kurushaho kwegera abaturage hagamijwe kubasobanurira ibibakorerwa no kubasobanurira serivisi zibagenewe ndetse no gukorera hamwe n’abandi bafatanyabikorwa mu kwihutisha iterambere ry’igihugu,Ikigega Cyihariye Cy’Ingoboka(SGF) cyitabiriye imurikabikorwa ryateguwe n’ihuriro ry’abafatanyabikorwa mu iterambere (JADF) mu karere ka Nyabihu. Ubuyobozi bw’Akarere bwashimiye abafatanyabikorwa bitabiriye iki gikorwa,cyabereye muri gare ya Mukamira kuva ku itariki 10 kugeza ku ya 12 Kamena 2026.

Umuyobozi w’akarere ka Nyabihu madamu MUKANDAYISENGA Antoinette yashimiye abafatanyabikorwa bitabiriye iri murikabikorwa abasaba gushyira imbaraga mu gutanga serivisi nziza,hashyirwa umuturage ku isonga,no kurangwa n'ubufatanye mu kuzamura iterambere ry'Akarere.

Abaturage basuye aho SGF yamurikiraga ibyo ikora basobanuriwe serivise zitangwa nayo, bishimira ubufasha buhabwa abangirizwa n’inyamaswa muri aka karere, ndetse n’abahura n’ibibazo by’impanuka zitezwa n’ibinyabiziga bitamenyekanye, n’ibitagira ubwishingizi.