Kuva ku itariki 20 kugeza 22 Gicurasi2025, Ikigega Cyihariye Cy’Ingoboka (SGF) cyitabiriye imurikabikorwa (open day) ryabereye mu karere ka Kirehe mu ntara y’iburasirazuba. Abafatanyabikorwa baryitabiriye babonye umwanya wo gusobanurira abaturage serivisi zijyanye n’ibyo bakora, bagira n’amahirwe yo kwigiranaho hagati yabo.

“Iterambere ry’umuturage, inshingano y’abafatanyabikorwa” iyi niyo yari insanganyamatsiko y’iri murikabikorwa. Nk’uko iyi nsanganyamatsiko ibisobanura, SGF yasobanuriye abitabiriye iri murikabikorwa uburyo igira uruhare mu kugoboka abangirijwe n’inyamaswa ndetse n’abaterwa impanuka n’ibinyabiziga bitamenyekanye, ibidafite ubwishingizi n’ibyambuwe ba nyirabyo ku ngufU.

Umuyobozi w’Akarere ka Kirehe bwana Rangiro Bruno, mu muhango wo gusoza imurikabikorwa yashimiye abafatanyabikorwa bose bitabiriye iki gikorwa, kuko cyagiriye akamaro abaturage ba Kirehe bagasobanukirwa serivisi zitangwa n’abafatanyabikorwa b’Akarere, bakarushaho kumenya ibibakorerwa n’aho babariza bakeneye serivisi zitangwa n’abafatanyabikorwa.