Mu rwego rwo gushimangira imikorere n’imikoranire bigamije gutanga serivisi nziza ku baturage, ku wa 24 Ukuboza 2025, SGF yitabiriye inama y’inteko rusange ya JADF yabereye mu Karere ka Nyamagabe.

Iyi nama yitabiriwe n’umuyobozi w’akarere ka Nyamagabe, bwana Niyomwungeri Hildebrand,umuyobozi w’akarere wungirije ushinzwe ubukungu bwana Habimana Thaddée n’abafatanyabikorwa batandukanye b’akarere. Inama yayobowe n’Umuyobozi wa JADF, Bwana Nzimurinda Emmanuel.

Abafatanyabikorwa basobanuriwe ko hakwiye kongerwa imbaraga mu bufatanye, kuko ari bwo buzafasha kwihutisha iterambere ry’akarere no gushyira mu bikorwa imihigo y’akarere uko bikwiye.

Mu ijambo rye, Umuyobozi w’Akarere yashimiye abitabiriye inama anabaha ikaze, ashimira by’umwihariko abafatanyabikorwa ku ruhare bagira mu iterambere ry’akarere n’imibereho myiza y’abaturage muri rusange. Yongeye kwibutsa ko nubwo hari byinshi bimaze kugerwaho, urugendo rwo gukura abaturage mu bukene rukiri rurerure, bityo hakaba hakenewe gukomeza ubufatanye n’imbaraga zifatika.

Yakomeje asaba abafatanyabikorwa kurushaho kwegera Akarere, ntibagarukire gusa ku mirenge bakoreramo, agaragaza ko ari ingenzi ko akarere kamenyana n’abafatanyabikorwa ndetse n’ibikorwa byabo. Yashimangiye ko iyo mikoranire yarushaho koroshya ishyirwa mu bikorwa ry’ibikorwa bigamije kuzamura imibereho y’abaturage no gutanga serivisi nziza kandi zisubiza ibibazo abaturage bafite

 SGF yiyemeje gukomeza gukorana neza n’inzego z’ibanze, kuko ubwo bufatanye bufasha kunoza serivisi zigenewe abaturage, no gushyigikira iterambere ryabo,nk’uko ariyo ntego nyamukuru ya leta ndetse  n’abafatanyabikorwa bose.