Ubwitabire bwa Special Guarantee Fund (SGF) mu marushanwa ya National Championship Games ya Deaf Sport Organisation (DSO), yabereye kuri Sitade Ubworoherane mu Karere ka Musanze, bwabaye umwanya w’ingenzi wo gushyigikira siporo y’abafite ubumuga no kugeza ku baturage amakuru ku nshingano n’imitangire ya serivisi z’Ikigega Cyihariye cy’Ingoboka.

Ku Cyumweru, tariki ya 8 Ugushyingo 2026, Special Guarantee Fund (SGF) yitabiriye imikino ya National Championship Games yateguwe na Deaf Sport Organisation, ku bufatanye na Komite y’Igihugu y’Imikino y’Abafite Ubumuga (NPC), ibera kuri Sitade y’Ubworoherane mu Karere ka Musanze.

Iki gikorwa cyahuje amakipe ahagarariye uturere twa Musanze, Nyanza, Kicukiro na Gasabo cyitabirwa n’abakinnyi, abayobozi n’abandi, cyabaye n’umwanya wo kugaragaza uruhare rwa siporo mu guteza imbere ubwitabire n’imibereho myiza y’abafite ubumuga.

Umuyobozi Mukuru wa SGF, Madamu NIBAKURE Florence, na we yari yitabiriye iki Gikorwa. Ubwitabire bwe bwagaragaje ko Ikigega Cyihariye cy’Ingoboka gishyigikira ibikorwa by’imikino n’ibindi bigamije guteza imbere ubufatanye n’imibereho myiza y’abaturage cyane cyane abafite ubumuga.

Imikino yaranzwe n’ishyaka 

Muri aya marushanwa habaye imikino ibiri. Umukino wa mbere wahuje ikipe ya Musanze n’iya Nyanza, urangira Musanze itsinze ibitego 3 kuri 2 bya Nyanza. Mu mukino wa kabiri, ikipe ya Kicukiro yatsinze iya Gasabo ibitego 2 kuri 0.

Iyi mikino yatanze umwanya ku bakinnyi wo kugaragaza ubushobozi bwabo, gukorera hamwe no guhatanira intsinzi, inashimangira uruhare rwa siporo mu guteza imbere impano n’ubushobozi bw’abantu bafite ubumuga.

SGF yifashishije iyi mikino mu kumenyekanisha inshingano zayo

Uretse gushyigikira imikino, SGF yanabonye umwanya wo kwegera abitabiriye no kubagezaho amakuru ku nshingano zayo, uruhare igira mu gufasha abaturage ndetse na serivisi itanga.

Iki kiganiro cyari kigamije gufasha abitabiriye kurushaho kumenya Ikigega Cyihariye cy’Ingoboka, gusobanukirwa ibyo gishinzwe no kumenya aho bashobora kunyura kugira ngo babone amakuru cyangwa ubufasha bijyanye n’inshingano zacyo.

Nyuma y’ibisobanuro byatanzwe, abitabiriye bahawe umwanya wo kubaza ibibazo bijyanye n’ibyo bari bamaze kumva. Abahagarariye SGF basubije ibibazo byabajijwe, batanga ibisobanuro byafashije kurushaho gusobanura imikorere n’inshingano zayo.

Mu rwego rwo gukomeza kumenyekanisha SGF, nyuma y’ikiganiro cyatanzwe, abayobozi batandukanye batanze ibibazo bigamije kureba ko abahawe ikiganiro basobanukiwe. Ushubije neza agahabwa umutaka. Iki gikorwa na cyo kikaba cyarishimiwe cyane abitabiriye barwana ishyaka mu gusubiza ibibazo. 

Kwegera abaturage no kugeza amakuru kuri bose

Uruhare rwa SGF muri iki gikorwa rwishimiwe cyane n’abitabiriye bose banasabako yakomeza gutera inkunga imikino y’abafite ubumuga mu byiciro bitandukanye aho by’umwihariko, gukorana n’imiryango ihagarariye abafite ubumuga bitanga amahirwe yo kugeza ubutumwa ku byiciro bitandukanye by’abaturage nta wuhejwe, hagamijwe ko buri wese amenya serivisi za SGF zimureba n’uburyo yazigeraho.

SGF izakomeza gushyigikira ibikorwa byo kwegera abaturage, ubukangurambaga no gukorana n’abafatanyabikorwa batandukanye, hagamijwe kongera ubumenyi kugira ngo abaturage barusheho gusobanukirwa inshingano zayo n’uburenganzira bwabo.