Mu rwego rwo gukumira ubwone bw’inyamaswa, abaturage bo mu murenge wa Nasho mu karere ka Kirehe ku bufatanye n’ubuyobozi ndetse n’ibikorwa bya VUP(Vision Umurenge Program), bacukuye umuferege wabafashije gutuma uburyo bonerwaga n’imvubu bigabanuka. Uretse uyu muferege, REMA yabafashije kubona ibiti by’imifatangwe byatewe ku nkengero z’iki kiyaga, amahwa yabyo atuma imvubu zitabirenga.

Mporendame Innocent, ni umuturage uhinga mu nkengero z’iki kiyaga. Asobanura ko uyu muferege ndetse n’ibi biti byabafashije cyane, kuko byakumiriye imvubu zahanyuraga ziza kubonera. Asobanura ko kuva hashyirwa ibi bikorwa bikumira izi mvubu, ubwone bwagabanutse ku buryo bugaragara. Asaba ko bafashwa hakongerwa ingano y’umuferege n’ibiti, kuko aho bitari ariho imvubu zinyura zibonera.

Umukozi ushinzwe ubuhinzi mu murenge wa Nasho bwana Mbarushimana Bonaventure, asobanura ko uyu muferege wacukuwe n’abaturage bafatanyije n’ubuyobozi, kongeraho ibiti by’imifatangwe bahawe na REMA byatanze umusaruro mu kugabanya ubwone bw’imvubu. Yemeza ko babashije kubona inkunga y’ibindi biti babikoresha n’ahandi haturuka imvubu, bikajya bizikumira.